A Axencia Galega da Industria Forestal (Xera) e a Universidade de Vigo presentaron hoxe os prototipos de pantallas acústicas elaboradas con madeira que deseñou o Laboratorio de Madeiras da Escola de Enxeñaría Forestal de Pontevedra para o seu uso como dispositivos redutores do ruído que xera o tráfico nas estradas, as vías do tren ou as áreas industriais.
O director da Axencia Galega da Industria Forestal (Xera), Jacobo Aboal, asistiu esta mañá ao acto de presentación deste proxecto, que se desenvolveu no marco do convenio plurianual de colaboración que este organismo dependente da Consellería de Economía e Industria mantén coa Universidade de Vigo.
O obxecto deste acordo, segundo apuntou, é promover o estudo, desenvolvemento e ensaio de elementos de madeira para mitigación acústica, favorecendo así a transferencia de coñecemento e tecnoloxía entre os diferentes axentes da industria forestal -particularmente as empresas do sector-, as universidades e os centros de investigación vinculados.
Os paneis modulares presentados hoxe empregan madeira local de piñeiro, de alta durabilidade, termotratada e tratada en autoclave (aquela na que se introducen elementos protectores); tamén cortiza termotratada, que ofrece un bo comportamento de illamento e absorción. Os valores de illamento preliminares, que serán contrastados con ensaios nun laboratorio especializado de son, acadan unha redución de ruído superior ao 15 %.