O director da Axencia Galega da Industria Forestal (Xera), Alfredo Fernández Ríos, xunto co director xeral de Planificación e Ordenación Forestal, José Luis Chan, asistiron esta mañá ás xornadas técnicas sobre sanidade forestal organizadas dentro do programa de actos do 5º Encontro Intersectorial do piñeiro-Piñeiros 2025, organizado pola Fundación Arume en colaboración coa Xunta de Galicia.
Acompañados de profesionais do sector en Galicia, así como dun grupo de expertos de Uruguai e Chile, e do secretario de Estado das Florestas de Portugal, Rui Ladeira, tiveron oportunidade de visitar distintas masas forestais afectadas por enfermidades fúnxicas e rodais de ensaio con especies de piñeiro pinaster mellorado e piñeiro radiata seleccionado e piñeiro taeda, situadas en montes dos municipios coruñeses de Frades e Ames e o pontevedrés de Cuntis. A xornada está a servir para intercambiar coñecementos neste eido e terá continuidade mañá xoves cunha visita ao CIF de Lourizán.