O director da Axencia Galega da Industria Forestal (Xera), Jacobo Aboal, participou hoxe na xornada Edificando en Madeira: Unha oportunidade para Navarra onde destacou a aposta da Xunta polo aproveitamento sustentable do sector da madeira en Galicia.
Na súa intervención, o director lembrou que o sector madeireiro é un dos seis sectores declarados como estratéxicos polo Consello da Xunta e nesta liña puxo en valor que en Galicia existe un forte vínculo coa masa forestal, fonte de riqueza, e que debe ser aproveitada con responsabilidade.
Aboal subliñou que o Executivo autonómico ten un compromiso claro coa consolidación dun sector forestal forte, sustentable e adaptado aos tempos, e ademais, segundo explicou, este compromiso co sector da madeira ten unha tradución en materia de vivenda.
Neste sentido, o director da Axencia Galega da Industrial Forestal destacou que ademais das axudas publicadas para impulsar a construción con madeira no ámbito privado por importe de 5M€, a Xunta márcase o obxectivo conxunto de que progresivamente o 20% das edificacións da Administración pública galega empreguen madeira na súa estrutura.
Para acadar este obxectivo, chegouse a acordos de colaboración entre organismos públicos como o subscrito entre XERA e o SERGAS ou a Axencia Galega de Infraestruturas para que se incorpore na medida do posible o uso da madeira nas infraestruturas promovidas e/ou executadas pola Axencia Galega de Infraestruturas.