O director da Axencia Galega da Industria Forestal (Xera), Alfredo Fernández Ríos, inaugurou esta mañá a primeira das accións formativas organizadas no marco do programa de axudas Xera-Savia, que busca mellorar e reforzar as habilidades profesionais do persoal traballador do sector da madeira para incrementar a competitividade e o coñecemento en todas as fases da cadea de valor. Unha xornada para reivindicar o papel da biomasa dentro da cadea monte-industria que promove o clúster do sector como entidade beneficiaria desta liña de apoios que impulsa o Goberno galego e á que nesta edición destina preto de medio millón de euros.
Fernández Ríos subliñou a importancia de asegurar a cualificación e capacitación profesional adecuándoas ás novas tendencias e desafíos da industria forestal “todo elo no marco da evolución cara una sociedade baseada na bioeconomía”, engadiu ao tempo que asegurou que xornadas como a celebrada hoxe garanten un sector adaptado aos novos procedementos normativos e ás necesidades dunha sociedade que avanza baixo criterios de sustentabilidade.
O director da Xera lembrou que o Clúster da Biomasa foi unha das 9 entidades beneficiadas do programa Xera-Savia, xunto coas tres principais asociacións sectoriais (Fearmaga, Lugomadera e Asefoga), o Clúster da Madeira de Galicia, as tres universidades galegas (Universidade de Santiago de Compostela, Universidade da Coruña e o Centro de Estudios Superiores Universitarios de Galicia) e o Colexio Oficial da Enxeñaría Técnica Forestal de Galicia. Todas elas teñen previsto organizar 56 actividades formativas e de divulgación.