Culleredo, 9 de Abril de 2026
O director da Axencia Galega da Industria Forestal (Xera), Alfredo Fernández Ríos, visitou esta mañá o Centro Tecnolóxico de Investigación Multisectorial (Cetim), emprazado no municipio coruñés de Culleredo, para abordar posibles liñas de colaboración no ámbito da innovación aplicada á industria forestal e á construción con madeira. A visita enmárcase dentro das liñas de traballo que desenvolve a Axencia para o impulso á mellora da competitividade do tecido industrial galego vinculado á valorización dos recursos forestais.
Durante o percorrido, Fernández Ríos puido coñecer as diferentes liñas de traballo que se desenvolven no Cetim, especialmente aquelas relacionadas coa valorización de recursos tanto mediante procesos de transformación mecánica como químicos, así como coa sustentabilidade, o desenvolvemento de novos materiais e a dixitalización. Unha visita que o director da Xera cualificou como de frutífera e da que ambas entidades destacaron o interese mutuo en articular alianzas que contribúan a fortalecer a cadea de valor monte-industria, favorecendo a transferencia de coñecemento e o desenvolvemento de proxectos conxuntos no futuro entre o Cetim e o Centro de Innovación e Servizos Tecnolóxicos da Madeira (Cis-Madeira), adscrito á Xera.