A Xunta vén de publicar no Diario Oficial de Galicia (DOG) as axudas concedidas pola Axencia Galega das Industrias Forestais (Xera) para a organización de actividades formativas non regradas que, nesta convocatoria, chegan ás 58 entre clases maxistrais, talleres, cursos, xornadas ou pílulas formativas. Con esta medida, o Goberno autonómico pretende impulsar o coñecemento e a competitividade da industria forestal-madeira de Galicia mediante a mellora da formación do seu capital humano.
A convocatoria destas axudas á formación conta cun orzamento total de 800.000 euros, 400.000 euros no presente ano 2024 e o restante no próximo exercicio económico. As entidades beneficiarias poden solicitar ata un máximo de 60.000 euros en axudas (ou de 100.000 euros por persoa beneficiaria no caso de ter presentadas varias solicitudes), que cobren o 100% dos gastos elixibles.
En total, catorce entidades do sector son as beneficiarias que organizarán estas actividades: o Clúster da Biomasa de Galicia, Lugomadera, Fearmaga, Resuga, PEFC Galicia, Bioeco2, Asefoga, Asociación de Desenvolvemento Rural Ódega, Cesuga, USC, Clúster da Madeira e do Deseño de Galicia, Colexio Oficial de Biólogos de Galicia, Asociación para el Desarrollo Educativo y Cultura e a Asociación Mulleres Autónomas Rurais de Galicia.
As 135 edicións das preto de sesenta accións de carácter formativo tratarán temáticas como o aproveitamento da madeira e da resina, o uso das TICs e as novas tecnoloxías dixitais, a certificación forestal, a xestión empresarial, as habilidades directivas e o márketing, a construción en madeira, a formación en clave de xénero ou os créditos de carbono, entre outros. As actividades estarán orientadas a profesionais da industria do sector forestal-madeira, así como a estudantes de formación profesional e universitarios vencellados a este ámbito.