A Axencia Galega da Industria Forestal, dependente da Consellería do Medio Rural, participa na organización dun curso gratuíto de Formación en Construción Industrializada e Eficiente con Madeira, en colaboración co Clúster da Madeira e o Deseño de Galicia, a Fundación Laboral da Construción e a Fundación Arume.

Esta actividade formativa está destinada especialmente a profesionais da carpintaría e a montaxe, aínda que tamén resulta de interese para empresarios do sector madeira e da construción, así como aos operarios e técnicos do eido da construción en xeral. Deste xeito, está aberto a todos aqueles axentes que poidan levar a cabo a execución de construcións en madeira en todas as súas fases.

O obxectivo do curso é capacitar a operarios do sector na fabricación de estruturas de madeira baseadas en entramados lixeiros e illantes térmicos, que permitan un consumo enerxético case nulo, así como fomentar o consumo de produtos locais producidos en Galicia. Tamén busca amosar o potencial dun eido emerxente e dotar aos asistentes de ferramentas básicas que lles faciliten nun futuro a execución técnica de edificios de consumo enerxético case nulo.

Terá dúas semanas de duración, divididas nunha parte teórica online -do 11 ao 15 de setembro- e outra práctica -do 18 ao 22-, que consistirá na creación dunha construción industrializada de alta eficiencia enerxética de madeira duns 20m². Os seminarios teóricos estarán impartidos por profesorado especializado con ampla experiencia no sector. As prazas son limitadas e os interesados poden inscribirse nesta ligazón ata o 4 de setembro.

Ligazón ao formulario:

https://docs.google.com/forms/d/1lOvHc8p62yjKVFuaOBUO7tutEkrEcxClZP0zwozD6JI/viewform?pli=1&pli=1&edit_requested=true