A conselleira de Economía e Industria, María Jesús Lorenzana, participou hoxe na presentación do Informe anual da cadea monte-industria, elaborado pola Universidade de Vigo co apoio da Axencia Galega da Industra Forestal (Xera)
Do informe despréndese que en 2023 Galicia aproveitou case 9,8 millóns de metros cúbicos de madeira, consolidándose como unha das principais rexións produtoras de Europa
Cifra a facturación desta industria en máis de 2.400 M€ anuais con máis de 19.000 persoas empregadas
En canto ao comercio exterior, en 2023 o sector exportou por valor de 2.396 M€, unha contía similar á do ano 2022, cando se acadou un máximo histórico de máis de 2.400 M€ que supuxo un fito na tendencia crecente desde o ano 1995
A conselleira de Economía e Industria, María Jesús Lorenzana, participou hoxe na presentación do Informe anual da cadea monte-industria, elaborado pola Escola de Enxeñaría Forestal de Pontevedra co apoio da Axencia Galega da Industria Forestal (Xera), onde se puxo de manifesto a contribución económica e laboral deste sector, que representa o 12 por cento do emprego industrial en Galicia e é indispensable para a economía verde e o equilibrio territorial.
Do informe despréndese que en 2023 Galicia aproveitou case 9,8 millóns de metros cúbicos de madeira, consolidándose como unha das principais rexións produtoras de Europa. Tamén cifra a facturación desta industria en máis de 2.400 millóns de euros anuais.
O emprego nas catro ramas principais da cadea de valor superan a data de novembro de 2024 os 19.000 afiliados na Seguridade Social; unha cifra á que habería que engadir os profesionais autónomos e todos aqueles que teñen a afiliación vinculada a algunha das actividades restantes da cadea como a produción de enerxía, o transporte, a construción, etc.
En canto ao comercio exterior, en 2023 o sector exportou por valor de 2.396 millóns de euros, unha contía similar á do ano 2022, cando se acadou un máximo histórico de máis de 2.400 millóns de euros que supuxo un fito na tendencia crecente desde o ano 1995. Esa tendencia é similar nos distintos grupos de familias de produtos, tanto madeira como as súas manufacturas, pasta, papel e mobiliario.
Lorenzana estivo acompañada do director da Xera, Jacobo Aboal, quen salientou que a transición cara a unha economía circular é unha oportunidade para desenvolver novos produtos derivados da madeira, diversificar mercados e avanzar en tecnoloxías innovadoras que incrementen a competitividade do sector. O obxectivo é seguir impulsando a modernización das industrias de segunda e terceira transformación, sabendo que o forestal é un sector clave para o desenvolvemento do medio rural, onde xera emprego de calidade e fixa poboación.
As medidas adoptadas pola Xunta a través da Xera en apoio á cadea Monte-industria, en todo 2024 suman 10 millóns de euros. Entre elas, figura o Plan director do sector forestal, actualmente en proceso de elaboración, que establecerá as liñas mestras para afrontar os retos do sector e reforzará a colaboración entre a industria e a Administración autonómica, comprometida cun desenvolvemento sostible e competitivo.
As axudas da Axencia Galega da Industria Forestal (XERA) inclúen apoios para impulsar a utilización de madeira na construción estrutural, priorizando produtos de montes galegos sustentables con certificacións PEFC/FSC ou a marca Pino de Galicia. A meta é alcanzar progresivamente un uso da madeira do 20 % tanto na construción privada como na edificación pública.
Por outra banda, tamén se destinan apoios para incentivar a dixitalización e a innovación en pequenas e medianas empresas, ademais de fomentar investimentos en tecnoloxías forestais e a valorización de pemes de primeira e segunda transformación. E, no referente á cualificación profesional, a Xunta segue impulsando programas de formación especializada que garanten unha man de obra adaptada ás demandas actuais e futuras do sector.