O obxecto deste acordo é incorporar sistemas construtivos que maximicen o uso de materiais de orixe biolóxica e reciclables como a madeira nas obras públicas de ampliación, rehabilitación, reforma e nova creación, para diminuír a pegada de carbono na edificación pública
A conselleira María Jesús Lorenzana enmarcou esta iniciativa na aposta do Goberno galego por que o aproveitamento dos recursos naturais beneficie a toda a cidadanía, tal e como recolle a Lei de recursos naturais de Galicia
“Estamos a liderar un cambio cara a unha construción máis sostible”, destaca Martínez Allegue, que puxo en valor a madeira galega “como material que nos permite construír dun xeito sostible, eficiente e de calidade”
A conselleira de Economía e Industria, María Jesús Lorenzana, asinou hoxe dous convenios de colaboración coa titular de Vivenda e Planificación de Infraestruturas, María Martínez Allegue, segundo os cales a Axencia Galega da Industria Forestal (Xera), a través do CIS Madeira, o Instituto Galego de Vivenda (IGVS) e a Axencia Galega de Infraestruturas (AXI) se comprometen a promover a construción en madeira na edificación pública.
O obxecto deste acordo é incorporar sistemas construtivos que maximicen o uso de materiais de orixe biolóxica e reciclables como a madeira nas obras públicas de ampliación, rehabilitación, reforma e nova creación para diminuír a pegada de carbono na edificación pública.
A conselleira María Jesús Lorenzana enmarcou esta iniciativa na aposta do Goberno galego por que o aproveitamento dos recursos naturais beneficie a toda a cidadanía, tal e como recolle a Lei de recursos naturais de Galicia. Un obxectivo, dixo, no que están aliñados todos os departamentos da Xunta. Nese sentido, considerou que á hora de fomentar a construción en madeira, para o que este ano se destinaron 5M€ para particulares e empresas, “a Administración pública tamén ten que dar exemplo”, de aí o convenio asinado hoxe. Contribúe a impulsar a cadea de valor do sector forestal, dixo, que representa case o 2 por cento do PIB galego.
Pola súa banda, a conselleira de Vivenda e Planificación de Infraestruturas, María Martínez Allegue, subliñou que estes dous convenios amosan “a aposta da Xunta por unha construción máis descarbonizada”. “Estamos a liderar un cambio cara a unha construción máis sostible”, destacou, poñendo en valor a madeira galega “como material que nos permite construír dun xeito sostible, eficiente e de calidade”. Indicou que no caso da AXI, fomentarase o uso da madeira en obras de fomento da mobilidade sostible, de acordo co Plan de Sendas, e nas encomendas para ampliacións, rehabilitacións, reformas e na construción de novos edificios públicos, mentres que desde o IGVS farase tanto nas rehabilitacións como na construción de novos edificios. Allegue agradeceu a colaboración do sector madeireiro e da construción “que nos acompañan neste camiño”.
En virtude deste acordo, a Xera a través da súa Área de Promoción e Calidade Forestal e do CIS Madeira, comprométese a revisar, a petición do IGVS con carácter facultativo, os pregos de prescricións técnicas particulares daquelas licitacións públicas nas obras de calquera tipo que incorporen madeira con fins estruturais ou funcionais.
Tamén prestará asesoramento técnico na redacción dos proxectos de trazado ou construtivos, nas inspeccións e na elaboración do informe de mantemento das estruturas de madeira, o cal incluirá un plan de actuacións específicas programadas para asegurar a vida útil da estrutura. En concreto, naquelas obras que así se estableza conxuntamente, realizará unha avaliación do ciclo de vida (LCA) e a declaración ambiental do edificio (EBD) ou de determinados produtos (EPD). E tamén fará visitas técnicas ás obras.
Por parte do IGVS e da AXI, valorarase incorporar requisitos de carácter medioambiental ou exixencias funcionais nos proxectos de construción de edificacións como, por exemplo, limiares máximos de pegada de carbono dos materiais de madeira. Para facer o cálculo, teranse en conta as emisións de transporte desde a orixe do material ata os centros de transformación e desde o último destes centros ata a obra de execución. Tamén unha garantía na calidade dos materiais de madeira ou de prazos mínimos da súa perdurabilidade.
Ademais, tamén se fomentará o uso da madeira nas obras de fomento da mobilidade sustentable, de acordo co Plan de sendas de Galicia. De feito, en virtude deste convenio, o CIS Madeira prestaralle asesoramento á AXI na redacción dunha instrución para o deseño de pasarelas peonís de madeira.
Favorecerase a utilización da ferramenta de trazabilidade de orixe da madeira mediante tecnoloxía blockchain creada pola Xunta de Galicia (FORTRA), de uso público e gratuíto, que asegure a xestión forestal sustentable (PEFC ou FSC) dos bosques dos que procede a madeira e aqueloutras marcas de garantía que así se desexen. Ademais, esta ferramenta incorpora o cálculo da pegada de carbono e o radio (en quilómetros) de proximidade.
Xunto con isto, ambas as dúas partes coordinaranse na organización de accións formativas dirixidas preferentemente a empregados públicos, proxectistas, técnicos ou instaladores onde poidan adquirirse coñecementos sobre as técnicas construtivas vixentes para asegurar o comportamento estrutural e a vida útil, que incluirá unha ou varias xornadas in situ para coñecer a posta en práctica das técnicas construtivas expostas.