A conselleira de Economía e Industria, María Jesús Lorenzana, felicitou hoxe aos promotores do proxecto que resultou gañador do concurso de ideas para a rehabilitación do Pazo de Lourizán -o equipo formado polos estudos de arquitectura cataláns Carme Pinós e Carles Enrich Studio-, do que destacou a súa idoneidade para darlle unha segunda vida e novos usos ás históricas instalacións.
Lorenzana, acompañada da conselleira de Vivenda e Planificación de Infraestruturas, María Martínez Allegue; do director da Axencia de Turismo de Galicia, José Manuel Merelles; e máis do delegado territorial, Agustín Reguera, participou esta mañá na entrega dos premios aos traballos finalistas do concurso, dos que puxo en valor o seu grao de implicación coa iniciativa e o alto nivel de calidade das propostas presentadas.
Segundo dixo, a partir de agora, comeza a conta atrás para o novo Pazo de Lourizán, que recobra a actividade despois de tantos años e que se abre ao público en xeral cunha oferta de servizos moi diversificada: ocio, restauración, investigación científica e coworking, apuntou.
A peza que se entregou como premio está realizada en madeira procedente do cedro do Líbano que hai no Pazo de Lourizán, un exemplar monumental incluído no Catálogo Galego de Árbores Senlleiras de Galicia que medra ao pé das escaleiras do pazo como parte do xardín botánico que albergan as instalacións, con máis de 850 especies diferentes. En outono de 2023, o temporal rompeulle unha das súas pólas, que conservou o persoal do Centro de Investigacións Forestais de Lourizán, e coa que se fabricou o agasallo, obra do ebanista Aitor Martínez López de Arbina.
O equipo gañador, ademais do premio económico de 48.400 euros, será adxudicatario do contrato para a redacción do proxecto básico e de execución da obra, así como, de ser o caso, para a súa dirección. O segundo premio de 24.200 euros foi para a proposta co lema Buxus 117 presentada polo equipo formado dos estudios de Elizabeth Abalo Díaz, Gonzalo Alonso Núñez e María Fandiño González. O seguinte proxecto clasificado, que recibirá un premio de 18.150 euros, resultou Lalop 123 do equipo formado por MGM Morales de Giles SLP, Irisarri Piñeira SL, Ola Arquitectura SLP e García Fontán.
O certame concede catro accésits de 12.100 euros para os finalistas restantes que, por orde de clasificación, son: o equipo formado polos estudios de Creus e Carrasco Arquitectos SLP, Michèle&Miquel e Müller y Feijoo; a UTE GB Lourizán; o equipo de Alfonso Penela Fernández, Besada y Failde, BMJ Arquitectos SCP e Ruth Gundín Villar; e, por último, a UTE formada por Juan Domingo Santos, Mangado y Asociados SL, Carmen Moreno Álvarez e Carlos Quintáns Eiras.
Os sete proxectos arquitectónicos que chegaron á fase final, formarán parte dunha exposición aberta ao público que se inaugurará o próximo xoves 14 de novembro na cidade de Pontevedra.
A Xunta conta cun orzamento estimado de máis de 17 millóns de euros ata 2026 para o proxecto de reforma integral do Pazo e a súa contorna. A súa previsión é comezar as obras o vindeiro ano 2025 para rematar a rehabilitación deste edificio histórico en 2027.