O presidente da Xunta, Alfonso Rueda, acompañado pola conselleira de Vivenda e Planificación de Infraestruturas, María Martínez Allegue, salientou hoxe a aposta do Executivo galego polo aproveitamento sustentable do sector madeireiro en Galicia e pola progresiva incorporación da madeira ás novas edificacións públicas.
Na súa intervención no IV Encontro Intersectorial do piñeiro de Galicia, organizada pola Fundación Arume e en cuxa inauguración participou a conselleira de Medio Rural, María José Gómez, o titular do Goberno galego salientou a importancia dun acto tan relevante para o sector forestal.
Nesta liña, Rueda destacou a importancia da masa forestal para as rexións, apuntando a que en Galicia existe un forte vínculo con este recurso, “unha parte importante do noso emprego industrial”, que polo tanto “temos que coidar”. De feito, o madeireiro é un dos seis sectores declarados como estratéxicos recentemente polo Consello da Xunta.
En consecuencia, o presidente afirmou que o Goberno galego está comprometido coa consolidación dun sector forestal forte, sostible e adaptado aos tempos, capaz de acometer grandes transformacións en pouco tempo. “Temos empresas que levan moito tempo facendo as cousas ben” e que precisan “que a administración lles axude” afirmou Rueda. Nesta tarefa, o presidente da Xunta solicitou tamén a colaboración do sector coa Administración autonómica.
Por elo, o Executivo galego defende un “cambio de mentalidade” á hora de falar do “particular” sistema de propiedade da terra, apelando á unidade para ordenar a propiedade forestal e poñer o máximo de terreos en produción.
Así, algunhas das medidas nas que xa traballa o Goberno galego son a creación dun Plan Estratéxico das Masas de Coníferas en Galicia, apostar pola xestión forestal conxunta do monte galego e fomentar a creación de superficies forestais. De feito, unha das medidas máis destacables neste sentido é que no vindeiro ano convocaranse axudas para fomentar tanto a silvicultura produtiva, centrada nas coníferas, como a adaptativa, focalizada nas frondosas. Co obxectivo de mellorar a xestión forestal, a Xunta de Galicia destinará 15 millóns de euros.
Segundo indicou Rueda, nesta lexislatura o Executivo galego quere “recuperar tempo perdido en materia de vivenda”. O compromiso da Xunta con este ámbito tamén ten implicacións no sector madeireiro. Ademais das axudas publicadas para impulsar a construción con madeira no ámbito privado, o Goberno galego márcase o obxectivo conxunto de que progresivamente o 20% das edificacións da Administración pública galega empreguen madeira na súa estrutura. En palabras do presidente da Xunta, “temos unha oportunidade de cambiar esquemas” con esta medida que “vai pagar a pena” e “vai mobilizar ao sector”.
Para acadar este obxectivo, chegouse a acordos de colaboración entre organismos públicos como o subscrito entre XERA e a Axencia Galega de Infraestruturas para que se incorpore na medida do posible o uso da madeira nas infraestruturas promovidas e/ou executadas pola Axencia Galega de Infraestruturas.