Salienta que a previsión é que os traballos de restauración para “o novo rexurdimento” deste edificio estean rematados no 2027
O pazo seguirá sendo un centro de referencia forestal, pero ademais contará cunha área para exposicións, un espazo multiusos e albergará un hotel
A mostra permitirá facer un percorrido pola historia deste edificio e coñecer os sete proxectos finalistas no concurso de ideas para os novos usos
O presidente da Xunta, Alfonso Rueda, resaltou hoxe que a rehabilitación do Pazo de Lourizán en Pontevedra é unha prioridade para o Executivo autonómico e anunciou que as obras comezarán o vindeiro ano co obxectivo de que estean rematadas no 2027.
Durante a inauguración da exposición Lourizán, presente, pasado e futuro, sobre os traballos finalistas no concurso de ideas para os novos usos do pazo e acompañado das conselleiras de Economía e Industria, María Jesús Lorenzana, e de Vivenda e Planificación de Infraestruturas, María Martínez Allegue, salientou que a Xunta vai destinar 17,3 millóns de euros á restauración e posta á disposición da cidadanía destas instalacións.
Rueda fixo fincapé no valor arquitectónico e na importancia histórica que ten este edificio para a cidade de Pontevedra e explicou que, tras a rehabilitación, o Pazo de Lourizán vivirá “un novo rexurdimento” xa que seguirá sendo un centro de referencia forestal e contará cunha área para exposicións, un espazo público multiusos e un hotel de catro estrelas.
A mostra, que poderá visitarse ata o vindeiro 13 de decembro, de luns a venres, na sede de Afundación de Pontevedra, permitirá coñecer os sete proxectos arquitectónicos que chegaron á fase final do concurso de ideas organizado pola Xunta e ao que se presentaron 33 ofertas.
Ao longo destas semanas, os visitantes terán a oportunidade de coñecer o proxecto gañador –desenvolvido polo equipo integrado polos estudos de arquitectura cataláns Carme Pinós e Carles Enrich Studio– así como as demais propostas finalistas. Para iso, a exposición contará con 28 paneis con imaxes, planos e infografías do Pazo de Lourizán e a súa contorna; unha maqueta e máis de medio cento de fotografías que permiten facer un percorrido pola historia do recinto. A mostra complétase cunha visita virtual ao pazo a través de pantallas táctiles e interactivas.