O Goberno galego apoia con preto de medio millón de euros o desenvolvemento dunha nova edición do programa Xera-Savia, do que se beneficiarán 9 asociacións, centros universitarios e colexios profesionais do sector
Grazas a este programa, o persoal traballador na industria da madeira terá a oportunidade de participar en actividades de formación non regradas e accións divulgativas que impulsen o coñecemento e a competitividade
Os apoios enmárcanse dentro dos obxectivos da Axenda de impulso da industria forestal-madeira, unha folla de ruta deseñada conxuntamente cos principais axentes para potenciar o sector e fomentar a bioeconomía como motor de competitividade
O Consello da Xunta abordou esta mañá os resultados da última convocatoria do programa de axudas Xera-Savia. Unha iniciativa da Axencia Galega da Industria Forestal (Xera), dependente da Consellería de Economía e Industria, que busca mellorar e reforzar as habilidades profesionais do persoal traballador do sector para incrementar a competitividade e o coñecemento en todas as fases da cadea de valor. Grazas a esta nova convocatoria 9 asociacións, centros universitarios e colexios profesionais representativos da industria forestal-madeira galega organizarán 56 actividades formativas e de divulgación. Para elo, disporán dun orzamento de preto de 420.000 euros.
Nesta edición recibíronse un total de 12 solicitudes das que se admitiron a trámite 9 para a organización de 41 actividades formativas e 15 actividades de divulgación. Nomeadamente, resultaron beneficiadas as tres principais asociacións sectoriais (Fearmaga, Lugomadera e Asefoga), os dous clústeres sectoriais (Clúster da Madeira de Galicia e o Clúster da Biomasa de Galicia), as tres universidades galegas (Universidade de Santiago de Compostela, Universidade da Coruña e o Centro de Estudos Superiores Universitarios de Galicia) e o Colexio Oficial da Enxeñaría Técnica Forestal de Galicia.
Máis polo miúdo, e con respecto ao programa de accións que se vai levar a cabo, as actividades de formación non regrada representan o groso do importe das axudas concedidas cun total de 381.006,44 €, destacando o incremento de actividades relacionadas coas novas tecnoloxías e a aplicación da intelixencia artificial no sector, con 19 actividades formativas programadas.
Así mesmo, as accións para mellorar as competencias profesionais en materia de construción en madeira acadan case o 30 % da contía das achegas, con 8 actividades formativas programadas por importe de 123.472,83 €. Mentres, os apoios para a organización de actividades de divulgación representan un importe de 37.852,06 €.
Unha edición con abondosas novidades
As bases da última convocatoria do programa de axudas Xera-Savia para a formación non regrada incorporaron abondosas novidades froito do traballo conxunto do Goberno galego cos profesionais galego cos profesionais do sector e a súa cadea de valor, co fin de adecuar a oferta formativa ás necesidades reais.
Deste xeito, ademais da recuperación da liña de actividades de divulgación relacionadas coa industria forestal-madeira, o incremento da axuda máxima concedida por beneficiario pasa dos 60.000 euros da convocatoria anterior, aos 70.000 euros da actual. Así mesmo, establécense contías máximas para os custos das actividades de entre 300 e 500 euros/hora en función da tipoloxía da actuación e simplifícase a tramitación das solicitudes. E simplifícase a tramitación das axudas, reducíndose a carga administrativa na fase de solicitude e simplificando os criterios de avaliación, ao automatizar gran parte deles. Esta medida permitiu resolver a concesión das axudas nun prazo inferior a un mes desde o peche do prazo de presentación. Desde que botou andar o programa Xera-Savia no ano 2018, concedéronse preto dun centenar de axudas (82) para a organización de accións formativas non regradas e de divulgación. Estes apoios enmárcanse dentro dos obxectivos da Axenda de impulso da industria forestal-madeira, unha folla de ruta deseñada conxuntamente cos principais axentes para potenciar o sector e fomentar a bioeconomía como motor de competitividade.