O director da Axencia Galega da Industria Forestal (Xera), Alfredo Fernández Ríos, puxo en valor esta mañá a aposta do Xunta de Galicia por impulsar a madeira como elemento construtivo nas edificacións públicas, así como na importancia de formar nesta materia aos profesionais das administracións.
Fernández Ríos acompañou ao alumnado do curso Madeira estrutural. Bases e sistemas construtivos, nas visitas á empresa Xilonor, fabricante de madeira contralaminada (CLT) de piñeiro 100% galego, e provedora deste elemento construtivo no novo centro de saúde de Abegondo, unha edificación en construción promovida polo Sergas e a Axencia Galega de Infraestruturas (AXI) e que tamén foi visitada hoxe.
A actividade está organizada pola Escola Galega de Administración Pública (EGAP) no marco do Plan de Formación 2025 e coordinado pola Xera e se imparte nas modalidades de teleformación e presencial. Destinada ao persoal das administracións autonómica e local, trátase da primeira das catro accións formativas que a Consellería de Economía e Industria promove no marco do compromiso do Goberno galego para que o 20% da obra pública se faga en madeira.
O director da Xera aproveitou a súa presencia para animar aos 35 técnicos procedentes da Xunta e de preto dunha vintena de concellos galegos, para que afiancen os seus coñecementos no eido dos produtos e ferramentas de utilidade respecto do emprego da madeira estrutural e tamén para a contratación pública de edificacións sustentables, as dúas cuestións principais sobre as que está a xirar esta formación.
Finalmente, Alfredo Fernández subliñou que o emprego da madeira maciza industrializada está a medrar de xeito exponencial cada ano, unha mostra da aposta pola construción máis sustentable, eficiente e saudable.